OFFICERS OF DIVISION ELEMENTARY AND SECONDARY SCHOOL PAPER ADVISERS' ASSOCIATION for school years 2008-2010.

RO AKON NGA MGA TULA...

Ginabutang ko rikara do akon nga mga tula. Raya hay makita man sa bueabodalc.blogspot.com nga gina mentinar ni Mr. Melchor Cichon, isaea sa mga ginatahod nga personalidad pag abot sa literaturang Akeanon. Ro iba ko nga mga tula hay gina usoy ko pa, haanod ta siguro it baha ag euha nga daea ni Frank. Kung hikit-an ko ugaling hay mabasahan man ninyo dikara.

Pagpueaw Para sa Tula

Sa tungang gabii ako gapalitik
Para sa mga mahigugmaong tinaga
Rong keyboard hay galinagatik
Para eang ipahisayod ang pagpalangga
Rong mga guyom hay nagakarang
Sa tasa it katam-is

Kong kapeng maeamig nga taga-pukaw it isip
Apang sa kada hueag it mouse
Ro ang nagalimad nga mga mata
Nahidlaw magpiyong ay gaoy eot-a
Pero rong monitor hay may
Aparisyon it imong itsura
Para sa rayang gabii
Tapuson anay ro tula ngara
Ay nagahueat rong hin-aga
Gapangako nga kaibahan ka

Toto

Toto, hambae ku imong maestra
Ro imong bolpen mapuea ra tinta
Toto, pangabay kun gasueat ka
Timpla-timplaha man do letra
Kasayod ka baea?

Imong mga kaklaseng aktibista
Gintamnan it busoe nga tinga
Sa tunga it daywang ka mata
Toto, bata ka pa

Sa pilang adlaw marealisar mo
Ro pagiging maisog nga peryodista
Indi kabuhi it pamilya
Dahil atong sosyodad
Ginadominahan it kwarta
Apang Toto, kun pilion mo
Ro daean it pag bag-o
Kabay pa nga indi ka mag nu-oe
Kun sanda kimo magbu-oe
Ag tamnan ka it busoe nga tingga
Sa tunga it daywang ka mata
Indi eang pagkalipat nga iya ako
Kapareho mo man nga nagahandom
It malisod abuton nga damgo


Maisog
Rong maisog nga megaphone hay nagahugom
Eon it nagmaeang eaway
Apang ro ang limog hay may gahum
Nga indi mapahipos it kaaway
Rong tapo-tapo it kalye
Sa akong ilong nagbara
Apang rong kainit it kalye
Indi makapahina sang ginhawa
Rong pueang pintura hay naeunot
Kaibahan rong placard nga kartolina
Apang rong pulis nga may kilay nga eukot
Ra eandong wa kang kapaeuya
Apang…
Ro kaisog
Kimo man lang
Naga-euhod ag nagakurog


Adlaw ag Sorbetes

Rong haring adlaw sa eangit
Nagapaeanay sa sorbetes
Nga nagapawi sa init

It gapamasyar sa plaza nga burgis
Rong haring adlaw sa eangit
Nagapaeanay man sa hueas
It trabahador nga maitom it panit
Apang rong daba-daba it eangit
Indi katunaw sa kahugod

It pobreng may maitom nga panit
Para hin-aga sa tam-is it
Nagaeanay-eanay nga sorbetes
Bisan paalin hay makasamit

Kikiam

Sa plaza hay malipayon rong tindera
Dahil baligyang kikiam hay mabakae
Sa kada tuslok it stik hay kuwarta
Ay rong plaza eonsukan it gapaliwa-liwa
Apang sa kada tuslok na sa kikiam
Matsa nagadueot man sa akong tagipusuon
Dahil iya sa plaza ako ga agam-agam
Nga naga-isaeahanon
Samtang naga-agi rong mga manugsimba
Ag mga nagaholding hands nga may gugma
Ako, katuead it kikiam ginaprito sa kakueba
Ikaw sa maeayo ginakamusta
Pinili mo ro ibang nasyon
Dahil imong puturo pagausuyon
Sa lugar nga gapakunyag do yelo
Gintahak mo bisan buko’t sigurado
Samtang ako iya isaea sa plaza
Sa akong dughang nagakahidlaw
Kikiam gid lang ro nagapakalma